E-Entertainment

Khaatir se ya lihaaz se main maan to gaya
jhoothi qasam se aap ka imaan to gaya

dil leke muft kehte hain kuch kaam ka nahi’n
ulti shikaayatein rahi’n ehsaan to gaya

ab shaay-e-raaz-e-ishq go zillatein huee’n
lekin usse jata to diya, jaan to gaya

dekha hai butkade mein jo ae sheikh kuch na kuch
imaan ki to ye hai ki imaan to gaya

daraata hoon dekh kar dil-e-be-aarzu ko main
sunsaan ghar ye kyun na ho mehmaan to gaya

go naamaabar se khush na hua par hazaar shuqr
mujhko wo mere naam se pehchaan to gaya

hosh-o-hawaas-o-taab-o-tavaa’n “Daag” ja chuke
ab hum bhi jaane waale hain saamaan to gaya.

Poet: DAAG DEHALVI

Sent By: Imran From Orkut