E-Entertainment » behtreen ghazal

Urdu Poetry: Udaas kaagazi mausam mein rang-o-bu rakh de

NaQonianz — Tue, 04 Aug 2009 09:25:12 +0000

Udaas kaagazi mausam mein rang-o-bu rakh de
har ek phool ke lab pe mera lahu rakh de

zabaan-e-gul se chattaanein taraashne waale
sukoot-e-naqsh mein aaraaish-e-namu rakh de

giraa’n lage hai jo ehsaan dast-e-qaatil ka
uth aur teg ke lab pe rag-e-gulu rakh de

chala hai jaanib-e-maikhaana aaj phir vaaiz
kahee’n na jaam pe lab apne bevazu rakh de

KHUDA kare mera munsif saza sunaane mein
mera hii sar mere qaatil ke rubaru rakh de

samandaro’n ne bulaaya hai tujh ko ae ‘Bekal’
tu apni pyaas ki sehraa mein aabru rakh de.

Poet: Bekal

Sent By: Imran From Orkut

Urdu Poetry: Rett par likh ke mera naam mitaaya na karo

NaQonianz — Fri, 17 Jul 2009 10:24:55 +0000

Rett par likh ke mera naam mitaaya na karo
aankhen sach bolti hain pyaar chupaaya na karo

log har baat ka afsaana bana lete hain
sab ko haalaat ki rudaad sunaaya na karo

ye zaroori nahi’n har shakhs maseeha hi ho
pyaar ke zakhm amaanat hain dikhaaya na karo

shehar-e-ehsaas mein pathraav bahot hain ‘Mohsin’
dil ko sheeshe ke jharonkho’n mein sajaaya na karo.

Poet: Mohsin Naqvi

Sent By: Imran

Urdu Poetry: Main Khayaal hoon kisi aur ka, mujhe sochta koi aur hai

NaQonianz — Fri, 17 Jul 2009 09:59:29 +0000

Main Khayaal hoon kisi aur ka, mujhe sochta koi aur hai,
Sar-e aaiinaa mera aks hai, pas-e aaiinaa koi aur hai.

Main kisi ki dast-e talab main hoon, to kisii ki harf-e duaa main hoon,
Main naseeb hoon kisi aur kaa, mujhe maangtaa koii aur hai.

Kabhi lot aayen to na poochhnaa, sirf dekhnaa bade Gor se,
Jinhain raaste main Khabar huee k ye raastaa koii aur hai.

Ajab aitabaar be-aitabaarii k daramiyaan hai zindagii,
Main kareeb hoon kisii aur k, mujhe jaantaa koii aur hai.

Wohi munsifon ki rivaayaten, wohi faisalon ki ibaaraten,
Mera jurm to koi aur thaa, per meri sazaa koi aur hai.

Terii roshani merii Khadd-o-Khaal se mukhtalif to nahin magar,
Tu qareeb aa tujhe dekh loon, tu wohi hai yaa koi aur hai.

Jo meri riyaasat-e neem shab ko Saleem subah na mil saki,
To phir is ki maani to ye huye k yahan khuda koi aur hai..

Sent By: Junaid Shabir