E-Entertainment » Daagh Dehlvi

Urdu Poetry: Khaatir se ya lihaaz se main maan to gaya

BaQir Bukhari — Tue, 04 Aug 2009 09:33:59 +0000

Khaatir se ya lihaaz se main maan to gaya
jhoothi qasam se aap ka imaan to gaya

dil leke muft kehte hain kuch kaam ka nahi’n
ulti shikaayatein rahi’n ehsaan to gaya

ab shaay-e-raaz-e-ishq go zillatein huee’n
lekin usse jata to diya, jaan to gaya

dekha hai butkade mein jo ae sheikh kuch na kuch
imaan ki to ye hai ki imaan to gaya

daraata hoon dekh kar dil-e-be-aarzu ko main
sunsaan ghar ye kyun na ho mehmaan to gaya

go naamaabar se khush na hua par hazaar shuqr
mujhko wo mere naam se pehchaan to gaya

hosh-o-hawaas-o-taab-o-tavaa’n “Daag” ja chuke
ab hum bhi jaane waale hain saamaan to gaya.

Poet: DAAG DEHALVI

Sent By: Imran From Orkut

Urdu Poetry: Na rava kahiye na saza kahiye

BaQir Bukhari — Fri, 17 Jul 2009 09:40:47 +0000

Na rava kahiye na saza kahiye
kahiye kahiye mujhe bura kahiye

dil mein rakhne ki baat hai gham-e-ishq
iss ko hargiz na barmala kahiye

wo mujhe qatl kar ke kehte hain
maanta hi na tha ye kya kahiye

aa gaee aap ko masihaaee
marne waalo’n ko marhaba kahiye

hosh udne lage raqeebo’n ke
“Daag” ko aur bewafa kahiye.

Poet: Daagh Dehlvi

Sent By: Ahad-e-Awargi

Urdu Poetry: Ranj ki jab guftagoo hone lagi

BaQir Bukhari — Thu, 16 Jul 2009 13:01:09 +0000

Ranj ki jab guftagoo hone lagi,
Aap se tum, tum se tu hone lagi.

Chaahiye paigaambar dono taraf,
Lutf kyaa jab duu-ba-duu hone lagi.

Merii rusawaayi ki nobat aa gayi,
Unki shuharat quu-ba-quu hone lagi.

Naazir barah gayi hai is qadar,
Aarazuu ki aarazuu hone lagi.

Ab to mil kar dekhiye kya rang ho,
Phir hamaarii justajuu hone lagi.

‘Daag’ itaraaye hue phirate hain aap,
Shaayad unkii aabaruu hone lagi.

Poet: Daagh Dehlvi

Sent By: Junaid Shabir