barsa bhi to kis dasht ke be-faiz badan par
ek umr mere khet thhey jis abr ko tarse

iss baar jo indhan ke liye kat ke gira hai
chidiyo’n ko bada pyaar thaa us boodhe shajar se

mehnat meri aandhi se to manasoob nahi’n thi
rehna tha koi rabt shajar ka bhi samar se

khud apne se milne ka to yaara na tha mujh mein
main bheed mein gum ho gaee tanhayee ke darr se

benaam musaafat hi muqaddar hai to kya gham
manzil kaa ta’ayyun kabhi hota hai safar se

patthraaya hai dil yoon ki koi ism padha jaaye
ye shehar nikalta nahi’n jaadu ke asar se

nikle hain to raste mein kahee’n shaam bhi hogi
sooraj bhi magar aayega is raah-guzar se.

Poet: PARVEEN SHAKIR

Sent By: Imran From Orkut

baadal ko kya khabar ki baarish ki chaah mein
kitne buland-o-baala shajar khaak ho gaye

jugnu ko din ke waqt pakadne ki zidd karein
bachche hamaare ahad ke chaalaak ho gaye

lehra rahi hai barf ki chaadar hata ke ghaas
sooraj ki shah pe tinke bhi bebaak ho gaye

sooraj dimaag log bhi iblaag-e-fiqr mein
zulf-e-shab-e-firaaq ke pechaak ho gaye

jab bhi gareeb-e-shehar se kuch guftagu huee
lehje hawa-e-shaam ke namnaak ho gaye

saahil pe jitne aabguzeeda thhey sab ke sab
dariya ke rukh badalte hi tairaak ho gaye.

Poet: PARVEEN SHAKIR

Sent By: Imran From Orkut

koi zanjeer phir waapas wahee’n par le ke aati hai
kathin ho raah to chhoot’ta hai ghar aahista-aahista
badal dena hai rasta ya kahee’n par baith jaana hai
ki thakta jaa raha hai humsafar aahista-aahista

khalish ke saath iss dil se na meri jaan nikal jaaye
khinche teer-e-shanaasaai magar aahista-aahista

hua hai sarkashi mein phool ka apna ziyaa’n dekha
so jhukta jaa raha hai ab ye sar aahista-aahista

meri shola mijaazi ko wo jangal kaise raas aaye
hawa bhi saans letii ho jidhar aahista-aahista.

[PARVEEN SHAKIR]

Sent By: Imran from Orkut Community

Suna hai janglon ka bhi koi dastoor hota hai

Suna hai sher ka jab pait bhar jaaye

To wo hamla nahin kerta,

Suna hai jab kisi nadi k paani main
Bue k ghonsle ka gandami saaya larazta hai

To nadi ki ro pehli machhilyaan us ko

Parosi maan leti hain,

Hava k taiz jhonke jab darakhton ko hilaate hain

To Meena apne ghar ko bhool ker

Ka’uve k andon ko paron main thaam leti hai

Suna hai Ghonsle se jab koi bacha gire to

Saara jangle jaag jaata hai.

Naddi main baar aa jaaye

Koi Pull toot jaaye

To kisi lakri k takhte per

Gulahri, Saanp, Cheeta aur Bakri

Saath hote hain.

Suna hai janglon ka bhi koi dastoor hota hai,

Khuda-wanda Jaleel-o Mu’atbar, Daana-o Beena Munsif-o Akber,

HUMARE SHAHAR MAIN AB,

JANGLON KA HI KOI DASTOOR NAAFIZ KER..!!

Poet: Parveen Shakir

Sent By: Junaid Shabir from Orkut Community Meer Taqi Meer