E-Entertainment » shaire

Urdu Poetry: Yun saja chaand k jhalka tere andaaz ka rang By Faiz Ahmad Faiz

NaQonianz — Fri, 20 Nov 2009 06:09:18 +0000

Yun saja chaand k jhalka tere andaaz ka rang,
Yun faza mehaki k badla mere hum-raaz ka rang.

Saya-e chashm main hairaan rukh-e roshan ka jamaal,
Surkhi-e lab pe pareshaan teri aawaaz kaa rang.

Be-piye hon k agar lutf karo aakhir-e shab,
Sheesha-e may main dhale subah k aaghaz ka rang.

Ik sukhan aur k phir rang-e takallum tera,
Harf-e sada ko inaayat kare aijaz ka rang.

Poet: Faiz Ahmed Faiz

NaQonianz — Fri, 20 Nov 2009 06:07:46 +0000

Raaz-e ulfat chhupa k dekh liya,
Dil buhat kuch jala k dekh liya.

Aur kya dekhne ko baaqi hai?
Aap se dil laga k dekh liyaa.

Wo mere hoke bhi mere na hue,
Un ko apna bana k dekh liyaa.

Aaj un ki nazar main kuch humne,
Sab ki nazrain bacha k dekh liyaa.

Aas us dar se toot’ti hi nahin,
Ja k dekha, na ja k dekh liyaa.

‘Faiz’, taqmeel-e gham bhi ho na saki,
Ishq ko aazmaa k dekh liyaa.

Poet: Faiz Ahmed Faiz

NaQonianz — Mon, 16 Nov 2009 11:28:20 +0000

Zameen’ pe chal na saka aasmaan se bhi gaya,
Katte jo parr to parinda urraan se bhi gaya.

Bhula diya to bhulaane ki intaha ker dee,
Ab wohi shakhs mere wehm-o gumaan se bhi gaya.

Kisi k haath se nikla huaa wo teer hoon main,
Hadaf ko chhoo na saka aur kamaan se bhi gaya.

Tabaah ker gayee mujhe pakke ghar ki khuwaahish,
Main apne gaaon k kache makaan se bhi gaya.

Paraayi aag main kooda to kya mila mujh ko,
Usay bacha na saka, apni jaan se bhi gaya..

NaQonianz — Tue, 06 Oct 2009 11:59:26 +0000

Aahat Si Koi Aaye To Lagta Hai Ke Tum Ho.
Saaya(Shadow) Koi Laheraye To Lagta Hai Ke Tum Ho.

Jab Shaakh Koi Haath Lagaate Hi Chaman Mein.
Sharmaaye, Lachak Jaye To Lagta Hai Ke Tum Ho.

Sandal Se Mahekti Huyi Purkaif Hawa Ka.
Jhonka Koi Takraye To Lagta Hai Ke Tum Ho.