E-Entertainment » shayari

Urdu Poetry: Woh kehti hai k kia ab bhi kisi k liye laal hari chooriyan khareedtay ho?

NaQonianz — Wed, 03 Mar 2010 06:54:32 +0000

Woh kehti hai k kia ab bhi kisi k liye laal hari chooriyan khareedtay ho???
main kehta hon ab kisi ki kalai pe yeh rang acha nahi lagta…

Woh kehti hai k kia ab bhi kisi k anchal ko aakash likhtay ho???
main kehta hon ab kisi kay aanchal main itni wosaat kahan hai…

Woh kehti hai k kia mere baad kisi larki se muhabbat howi hai tumhai???
main kehta hon, muhabbat sirf larki per mushtamil nahi hoti…

Woh kehti hai k janan! lehjay main bohat udaasiyat si hai???
main kehta hon k titliyon ne bhi mairay dukh ko mehsoos kiya hai…

Woh kehti hai k kia ab bhi mujhay bewafa k naam say yaad kartay ho???
main kehta hon k mairay nisaab main yeh lafz shamil hi nahi…

Woh kehti hai k kabhi mairay zikar per ro bhi laitay ho gay???
main kehta hon k mairi ankhon ko har waqt ki phoowar achi lagti hai…

Woh kehti hai k tumhari baaton main itni gehrai q hai???
main kehta hon k teri judai k baad mujh ko yeh aizaaz mila haI…

Urdu Poetry: Shareer jhoonke hawa k amaan main na rahe By Jaami

NaQonianz — Wed, 06 Jan 2010 11:07:20 +0000

Shareer jhoonke hawa k amaan main na rahe,
Pakke jo phal to shajar ki kamaan main na rahe.

Uchhal k choom rahe the hawaa k haathon ko,
Naddi main doob gaye jo chataan main na rahe.

Parra ha sakht masaail ka saamna sab ko,
K meethe lehje kisi ki zabaan main na rahe.

Najaane kon se aaseb ne daraaya tha!
Ajab parinde the, khaali makaan main na rahe.

Humare kurb ka sehra sametne waale,
Ajeeb log the jo darmiyaan main na rahe.

Dhundhalke shehar k bethe hain ghaat main Jaami’
Koi bhi shakhs yahaan aan baan main na rahe

Poet: Jaami

Urdu Poetry: Lab Pe Tere IQraar-E-Mohabbat Sher Ghazal Ka Lagta Hai

NaQonianz — Thu, 17 Dec 2009 11:19:05 +0000

Lab Pe Tere IQraar-E-Mohabbat Sher Ghazal Ka Lagta Hai.
Sharam Se Chahera Laal Gulaabi Phool Kamal Ka Lagta Hai.

Dil Ko Nazar Se Takraye Bhi Ek Zamaana Beet Gaya.
Choat Magar Hai Itni Taza Hadsa Kal Ka Lagta Hai.

Bekhud Ho Kar Mast Hawayein Aise Kab Lahrati Thin.
Ye Jaadoo To Halka Halka Us Aanchal Ka Lagta Hai.

Hum Samjhe The Bhool Gaye Hain Wo Chahat Ka Afsana.
Aaj Magar Dard Sa Dil Mein Halka Halka Lagta Hai.

Urdu Poetry: Aisa Lagta Hai Zindagi Tum Ho

NaQonianz — Thu, 03 Dec 2009 07:14:09 +0000

Aisa Lagta Hai Zindagi Tum Ho.
Ajnabi, Kaise Ajnabi Tum Ho.

Ab Koi Aarzoo Nahin Baaqi.
Justa-Ju Meri Aakhri Tum Ho.

Main ZameeN Par Ghana Andhera Hoon.
AasmanoN ki Chandani Tum Ho.

DostoN Se Wafa Ki Ummeedein.
Kis Zamaane Ke Aadmi Tum Ho….

Urdu Poetry: Dekh to dil ki jaan se uthta hai By Meer Taqi Meer

NaQonianz — Thu, 03 Dec 2009 07:10:31 +0000

Dekh to dil ki jaan se uthta hai
ye dhuaa’n sa kahaa’n se uthta hai

gor kis dil-jale ki hai ye falak
shola ek subah yaa’n se uthta hai

khaana-e-dil se zinhaar na jaa
koi aise makaa’n se uthta hai

naala sar khenchta hai jab mera
shor ek aasmaa’n se uthta hai

ladti hai uss ki chashm-e-shokh jahaa’n
ek aashob waa’n se uthta hai

sudh le ghar ki bhi shola-e-aawaaz
dood kuch aashiyaa’n se uthta hai

baithne kaun de hai phir uss ko
jo tere aastaa’n se uthta hai

yoon uthe aah uss gali se hum
jaise koi jahaa’n se uthta hai

ishq ek ‘Meer’ bhaari paththar hai
bojh kab naatavaa’n se uthta hai.

Poet: MEER TAQI MEER

Urdu Poetry: Ye Alag Baat Hai Saaqi Mujhe Hosh Nahin

NaQonianz — Thu, 03 Dec 2009 07:08:50 +0000

Ye Alag Baat Hai Saaqi Mujhe Hosh Nahin.
Hosh Itna Hai Ki Main Tujhse Faraamosh Nahin.

Main Teri Mast Nigaahi Ka Bharam Rakh Loonga.
Hosh Aaya Bhi To Kah Doonga Mujhe Hosh Nahi.

Yaad Itna Hain Ki Pahuncha Dar-E-Dilruba Tak.
Kya Kahoon Aage Ki, Aage Ka Mujhe Hosh Nahin..

Kabhi Un Mad Bhari AankhoN Se Piya Tha Ek Jaam.
Aaj Tak Hosh Nahin, Hosh Nahin Hosh Nahin.

Urdu Poetry: Yun saja chaand k jhalka tere andaaz ka rang By Faiz Ahmad Faiz

NaQonianz — Fri, 20 Nov 2009 06:09:18 +0000

Yun saja chaand k jhalka tere andaaz ka rang,
Yun faza mehaki k badla mere hum-raaz ka rang.

Saya-e chashm main hairaan rukh-e roshan ka jamaal,
Surkhi-e lab pe pareshaan teri aawaaz kaa rang.

Be-piye hon k agar lutf karo aakhir-e shab,
Sheesha-e may main dhale subah k aaghaz ka rang.

Ik sukhan aur k phir rang-e takallum tera,
Harf-e sada ko inaayat kare aijaz ka rang.

Poet: Faiz Ahmed Faiz

Urdu Poetry: Raaz-e ulfat chhupa k dekh liya By Faiz Ahmed Faiz

NaQonianz — Fri, 20 Nov 2009 06:07:46 +0000

Raaz-e ulfat chhupa k dekh liya,
Dil buhat kuch jala k dekh liya.

Aur kya dekhne ko baaqi hai?
Aap se dil laga k dekh liyaa.

Wo mere hoke bhi mere na hue,
Un ko apna bana k dekh liyaa.

Aaj un ki nazar main kuch humne,
Sab ki nazrain bacha k dekh liyaa.

Aas us dar se toot’ti hi nahin,
Ja k dekha, na ja k dekh liyaa.

‘Faiz’, taqmeel-e gham bhi ho na saki,
Ishq ko aazmaa k dekh liyaa.

Poet: Faiz Ahmed Faiz

Urdu Poetry: Haal-E-Dil Main Ne Jo Duniya Ko Sunana Chaha

NaQonianz — Mon, 16 Nov 2009 11:43:00 +0000

Haal-E-Dil Main Ne Jo Duniya Ko Sunana Chaha.
Mujh ko Har Shakhs Ne Dil Apna Dikhana Chaha.

Apni Tasweer Banane Ke Liye Duniya Mein.
Main Ne Har Rang Pe Ek Rang Charhana Chaha.

Khaaq-E-Dil Zauhar-E-Aayina Ke Kaam Aa Gayi.
Laakh Duniya Ne Nigahon Se Giraana Chaha.

Shola-E-Barg Se Gulshan Ko Bachane Ke Liye.
Main Ne Har Aag Ke Seene Mein Chupana Chaha.

Urdu Poetry: Na Shikaytein Na Gila Kare

NaQonianz — Mon, 16 Nov 2009 11:41:37 +0000

Na Shikaytein Na Gila Kare.
Koi Aisa Shakhs Hua Kare.

Jo Mere Liye Hi Sajaa Kare.
Mujh Se Hi Baatein Kiya Kare.

Kabhi Roye Jaye Be-Panaah.
Kabhi Be-Tahaasha Udas Ho.

Kabhi Chupke Chupke Dabe Qadam.
Mere Piche Aa Kar Hansa Kare.

Meri Qurbatein Meri Chahtein.
Koi Yaad Kare Qadam Qadam.

Main Taweel Safar Mein Hoon Agar.
Meri Waapasi Ki Dua Kare.