Bhool bethe the Ilaahi kya karain is dil ko hum?
Hijir main phir yaad jis Dil ne dilaayi aap ki.

Raabta jab dekha k gairon se barhaaya aapne,
Rafta rafta humne bhi chaahat ghataayi aap ki.

Aap k aashiq the hum, hooron pe kya kerte nazar,
Ahl-e Jannat se qasam aankhon ne khaayi aap ki.

Aap ko us ki khabar kya? aap the masroof-e khuwaab,
Raat bhar Zanjeer-e darr kis ne hilaayi aap ki.

Saadgi zaahir ki hai, Baatin main kitni hoshyaar,
Bhaid ki baat aaj tak humne na paayi aap ki.

Qatal ker k mujhko kehte hain wo kis kis naaz se,
Ye to hum ne sirf Chaahat aazmaayi aap ki..!

Jis se Hasrat’ ho gaye zair-o zabar bazm-e samaa’h,
Kis qayaamat ki ghazal mutarib ne gaayi aap ki..

Poet: Hasrat Mohani