Urdu Ghazal: Agar na zohara-jabeeno’n ke darmiyaa’n guzre By Jigar Moradabadi

Agar na zohara-jabeeno’n ke darmiyaa’n guzre
to phir ye kaise kate zindagi kahaa’n guzre

jo tere aariz-o-gesu ke daramiyaa’n guzre
kabhi-kabhi to wo lamhein bala-e-jaa’n guzre

mujhe ye weham raha muddato’n ke jurrat-e-shauq
kahi’n na khaatir-e-masoom par giraa’n guzre

har ek muqaam-e-mohabbat bahot hi dil-kash tha
magar hum ahl-e-mohabbat kashaa’n-kashaa’n guzre

junoo’n ke sakht maraahil bhi teri yaad ke saath
hasee’n-hasee’n nazar aaye jawaa’n-jawaa’n guzre

meri nazar se teri justuju ke sadqe mein
ye ek jahaa’n hi nahi’n saikdo’n jahaa’n guzre

hujoom-e-jalwa mein parvaaz-e-shauq kya kehna
ke jaise rooh sitaaro’n ke darmiyaa’n guzre

khataa mu’aaf zamaane se badagumaa’n hokar
teri wafa pe bhi kya-kya hamein gumaa’n guzre

khuloos jis mein ho shaamil wo daur-e-ishq-o-hawas
na raigaa’n kabhi guzra na raigaa’n guzre

isee ko kehte hain jannat isee ko dozakh bhi
wo zindagi jo haseeno’n ke darmiyaa’n guzre

bahot haseen sahi sohbatein gulo’n ki magar
wo zindagi hai jo kaanto’n ke daramiyaa’n guzre

mujhe tha shikwa-e-hijraa’n ke ye hua mehsoos
mere qareeb se hokar wo naagahaa’n guzre

bahot haseen manaazir bhi husn-e-fitrat ke
na jaane aaj tabiyat pe kyo’n giraa’n guzre

mera to farz chaman-bandi-e-jahaa’n hai faqat
meri bala se bahaar aaye ya khizaa’n guzre

kahaa’n ka husn ki khud ishq ko khabar na huee
raah-e-talab mein kuch aise bhi imtehaa’n guzre

bhari bahaar mein taaraaji-e-chaman mat poochh
KHUDA kare na phir aankho’n se wo sama guzre

koi na dekh saka jinko do dilo’n ke siwa
mu’aamlaat kuch aise bhi darmiyaa’n guzre

kabhi-kabhi to isee ek musht-e-khaak ke gird
tawaaf karte hue haft aasmaa’n guzre

bahot azeez hai mujhko unhee’n ki yaad “Jigar”
wo haadsaat-e-mohabbat jo naaghaa’n guzre.

Poet: Jigar Moradabadi

Check Also

Urdu Ghazal: Arzo sama kahan teri wos’at ko pa sake By Khawaja Meer Dard

Arzo sama kahan teri wos’at ko pa sake Mera hi dil hai wo ke jahan ...

Leave a Reply

Your email address will not be published. Required fields are marked *