Urdu Ghazal: Ek-ek patthar jodd ke maine jo deewar banaaee hai By Qateel Shifai

Ek-ek patthar jodd ke maine jo deewar banaaee hai
jhaanko uss ke peeche to rusvaaee hi rusvaaee hai

yoon lagta hai sote-jaagte auro’n ka mohtaaj hoon main
aankhein meri apni hain par unn mein neend paraaee hai

dekh rahe hain sab hairat se neele-neele paani ko
pooche kaun samandar se tujh mein kitni gehraaee hai

sab kehte hain ek jannat utri hai meri dharti par
main dil mein soochu’n shayad kamzor meri beenaaee hai

baahar sehan mein pairo’n par kuch jalte-bujhte jugnu thhey
hairat hai phir ghar ke andar kis ne aag lagaaee hai

aaj hua maaloom mujhe iss shehar ke chand sayaano’n se
apni raah badlte rehna sab se badi daanaaee hai

todd gaye paimaan-e-wafa is daur mein kaise-kaise log
ye mat soch ‘Qateel’ ke bas ek yaar tera harjaaee hai.

Poet: Qateel Shifai

Check Also

Urdu Ghazal: Arzo sama kahan teri wos’at ko pa sake By Khawaja Meer Dard

Arzo sama kahan teri wos’at ko pa sake Mera hi dil hai wo ke jahan ...

Leave a Reply

Your email address will not be published. Required fields are marked *