Urdu Ghazal: Marr mit’ta hoon khayaal par apne By Jaun Eliya

Marr mit’ta hoon khayaal par apne
wajdd aata hai haal par apne

abhi mat deejiyo jawaab ke main
jhoom to loo’n sawaal par apne

umr bhar apni aarzu ki hai
marr na jaau’n visaal par apne

ek ataa hai meri hawas-nigahee
naaz kar khad-o-khaal par apne

apna shauq ek heela saaz, so ab
shaq hai usko, jamaal par apne

jaane uss dam wo kiska mumkin ho
behas mat kar, muhaal par apne

tu bhi aakhir kamaal ko pahoncha
mast hoon main zawaal par apne

bas yunhi mera gaal rakhne de
meri jaan ! aaj gaal par apne

koi haalat to aitbaar mein hai
khush hua hoon malaal par apne

khud pe naadim hoon “Jaun”! yaani main
inn dino hoon kamaal par apne.

Poet: Jaun Eliya

Check Also

Urdu Ghazal: Arzo sama kahan teri wos’at ko pa sake By Khawaja Meer Dard

Arzo sama kahan teri wos’at ko pa sake Mera hi dil hai wo ke jahan ...

Leave a Reply

Your email address will not be published. Required fields are marked *