Urdu Ghazal: Tooti hai meri neend magar tumko is’se kya By Parveen Shakir

Tooti hai meri neend magar tumko is’se kya
bajte rahein hawaao’n se dar, tumko is’se kya

tum mauj-mauj misl-e-saba ghoomte raho
kat jayein meri soch ke par, tumko is’se kya

auro’n ka haath thaamo, unhein raasta dikhaao
main bhool jaoo’n apna hi ghar, tumko is’se kya

abr-e-gurez paa ko barasne se kya gharaz
seepi mein ban na payein gohar tumko is’se kyaa

le jayein mujhe maal-e-ghanimat ke saath udoo
tumne to daal di hai sipar, tumko is’se kya

tumne to thak ke dasht mein khemein laga diye
tanha kate kisi ka safar, tumko is’se kya.

Poet: Parveen Shakir

Check Also

Urdu Ghazal: Arzo sama kahan teri wos’at ko pa sake By Khawaja Meer Dard

Arzo sama kahan teri wos’at ko pa sake Mera hi dil hai wo ke jahan ...

Leave a Reply

Your email address will not be published. Required fields are marked *