Urdu Nazam: Ye husn tera ye ishq mera rangeen to hai badnaam sahi By Sahir Ludhiyanvi

Ye husn tera ye ishq mera
rangeen to hai badnaam sahi
mujh par to kaee ilzaam lage
tujh par bhi koi ilzaam sahi

iss raat ki nikhri rangat ko
kuch aur nikhar jaane de zara
nazaro’n ko behak jaane de zara
zulfo’n ko bikhar jaane de zara
kuch derr ki hi taskeen sahi
kuch derr ka hi aaraam sahi

jazbaat ki kaliyaa’n chun’na hai
aur pyaar ka tohfa dena hai
logo’n ki nigaahein kuch bhi kahein
logo’n se hamein kya lena hai
ye khaas ta’alluq aapas ka
duniya ki nazar mein aam sahi

rusavaaee ke dare se ghabra kar
hum tarq-e-wafa kab karte hain
jis dil ko basa lein pehlu mein
uss dil ko juda kab karte hain
jo hashr hua hai laakho’n ka
apna bhi wahi anjaam sahi

ye husn tera ye ishq mera
rangeen to hai badnaam sahi
mujh par to kaee ilzaam lage
tujh par bhi koi ilzaam sahi.

Poet: Sahir Ludhiyanvi

Related Posts Plugin for WordPress, Blogger...

Leave a Reply