Urdu Poem: Ishq Ka Jaadu By Amjad Islam Amjad

Ishq Ka Jaadu

Mera tamaam fan meri kaavish mera riyaaz

ek na-tamaam geet ke misre hain jinke beech

maani ka rabt hai na kisi qaafiye ka mel

anjaam jis ka tay na hua ho ek aisa khel

meri mata bas yahi jaadu hai ishq ka

seekha hai jisko maine badi mushkilo’n ke saath

lekin ye sahir-e-ishq ka tohfa ajeeb hai

khulta nahi’n hai kuch ke haqeeqat mein kya hai ye

taqdeer ki ataa hai ya koi saza hai ye

kis se kahein ae jaan ke ye qissa ajeeb hai

kehne ko yoon to ishq ka jaadu hai mere paas

par mere dil ke vaaste itna hai iska bojh

seene se ek pahaad-sa hat’ta nahi’n hai ye

lekin asar ke baab mein halka hai iss qadar

tujh pe agar chalaau’n to chalta nahi’n hai ye.

Poet: Amjad Islam Amjad

Check Also

Urdu Ghazal: Arzo sama kahan teri wos’at ko pa sake By Khawaja Meer Dard

Arzo sama kahan teri wos’at ko pa sake Mera hi dil hai wo ke jahan ...

Leave a Reply

Your email address will not be published. Required fields are marked *