Urdu Poem: Main Aur Meri Aawargi By Javed Akhtar

Main Aur Meri Aawargi

Phirte hain kab se dar-ba-dar ab iss nagar ab uss nagar
ek doosre ke hamsafar main aur meri aawargi
na aashna har rehguzar na meharbaa’n hai ek nazar
jaayein to ab jaayein kidhar main aur meri aawargi

hum bhi kabhi aabaad thhey aise kahaa’n barbaad thhey
befiqr thhey aazaad thhey masroor thhey dilshaad thhey
wo chaal aisi chal gaya hum bujh gaye dil jal gaya
nikle jala ke apna ghar main aur meri aawargi

wo maah-e-vash wo maah-e-rooh wo maah-e-kaamil hu-ba-hu
thee’n jis ki baatein ku-ba-ku uss se ajab thi guftugu
phir yoon hua wo kho gaee aur mujh ko zidd si ho gaee
laayenge uss ko dhoondh kar main aur meri aawargi

ye dil hi tha jo seh gaya wo baat aisi keh gaya
kehne ko phir kya reh gaya ashko’n ka dariya beh gaya
jab keh kar wo dilbar gaya tee liye main mar gaya
rote hain uss ko raat bhar main aur meri aawargi

ab gham uthaayein kis liye ye dil jalaayein kis liye
aansu bahaayein kis liye yoon jaa’n gawaayein kis liye
pesha na ho jis ka sitam dhoondenge ab aisa sanam
honge kahee’n to kaargar main aur meri aawargi

aasaar hain sab khot ke, imkaan hain sab chot ke
ghar band hain sab kot ke ab khatm hai sab totke
qismat ka sab ye khel hai andher hi andher hai
aise hue hain main aur meri aawargi

jab hamdam-o-hamraaz tha tab aur hi andaaz tha
ab soz hai tab saaz tha ab sharm hai tab naaz tha
ab mujhse ho to ho bhi kya,hai saath wo to wo bhi kya
ek behunar ek besabar main aur meri aawargi.

Poet: Javed Akhtar

Check Also

Urdu Ghazal: Arzo sama kahan teri wos’at ko pa sake By Khawaja Meer Dard

Arzo sama kahan teri wos’at ko pa sake Mera hi dil hai wo ke jahan ...

One comment

Leave a Reply

Your email address will not be published. Required fields are marked *