Urdu Poem: Tumhein Mujh Se Mohabbat Hai By Amjad Islam Amjad

Tumhein Mujh Se Mohabbat Hai

Mohabbat ki tabiyat mein
ye kaisa bachpana qudarat ne rakkha hai

ke jitni puraani jitni bhi mazaboot ho jaaye
isse taaeed-e-taaza ki zaroorat phir bhi rehti hai
yaqeen ki aakhiri hadd tak dilo’n mein lehlahaati ho
nigaaho’n se tapakti ho, lahu mein jagmagaati ho
hazaaro’n tarah se dilkash haseen haale banaati ho
usse izhaar ke lafzo’n ki haajat phir bhi rehti hai

mohabbat maangti hai yoon gawaahi apne hone ki
ke jaise tifl-e-saada shaam ko ek beej boye
aur shab mein baura uthe
zamee’n ko khod kar dekhe
ke paudha ab kahaan tak hai

mohabbat ki tabiyat mein ajab takraar ki khu hai
ke ye iqraar ke lafzo’n ko sunaane se nahi’n thakti
bichhadne ki ghadi ho ya koi milne ki sa’at ho
isse bas ek hi dhun hai
kaho mujh se mohabbat hai
kaho mujh se mohabbat hai

kuch aisi besukooni hai wafa ki sarzameeno’n mein
ke jo ahl-e-mohabbat ko sada bechain rakhti hai
ke jaise phool mein khushbu, ke jaise haath mein taara
ke jaise shaam kaa taara
mohabbat karane waalo’n ki sahar raato’n mein rehti hai
gumnaam ke shaakhcho’n mein aashiyaa’n banata hai ulfat ka
ye ain visaal mein bhi hijr ke khadsho’n mein rehti hai

mohabbat ke musafir zindagi jab kaat chukte hain
thakan ki karchiyaa’n chunte wafa ki ajrakein pehne
samay ki rahguzar ki aakhri sarhad pe rukte hain
to koi doobti saanso’n ki dori thaam kar
dheere se kehta hai
ke ye sach hai na
hamaari zindagi ek doosre ke naam likkhi thi
dhundhalaka sa jo aankho’n ke qareeb-o-door phaila hai
isee kaa naam chaahat hai
tumhein mujh se mohabbat thi
tumhein mujh se mohabbat hai

mohabbat ki tabiyat mein
ye kaisa bachpana qudarat ne rakkha hai…

Poet: Amjad Islam Amjad

Check Also

Urdu Ghazal: Arzo sama kahan teri wos’at ko pa sake By Khawaja Meer Dard

Arzo sama kahan teri wos’at ko pa sake Mera hi dil hai wo ke jahan ...

Leave a Reply

Your email address will not be published. Required fields are marked *