Urdu Poetry: Ab tum aagosh-e-tasavvur mein bhi aaya na karo By Kaifi Azmi

Ab tum aagosh-e-tasavvur mein bhi aaya na karo
mujhse bikhre hue gesu nahi’n dekhe jaate
surkh aankho’n ki qasam kaanpti palako’n ki qasam
thar-tharaate hue aansu nahi’n dekhe jaate

ab tum aagosh-e-tasavvur mein bhi aaya na karo
chhoot jaane do jo daaman-e-wafa chhoot gaya
kyun ye lagzeeda kharaami ye pashemaa’n nazri
tumne toda nahi’n rishta-e-dil toot gaya

ab tum aagosh-e-tasavvur mein bhi aaya na karo
meri aanho.n se ye rukhsaar na kumhla jaayein
dhoondhti hogi tumhein ras mein nahaai huee raat
jaao kaliyaa’n na kahee’n sej ki murjha jaayein

ab tum aagosh-e-tasavvur mein bhi aaya na karo
main is ujde hue pehlu mein bitha loon na kahee’n
lab-e-sheeree’n ka namak aariz-e-namakee’n ki mithaas
apne tarse hue hontho’n mein chura loon na kahee’n.

Poet: Kaifi Azmi

Check Also

Urdu Ghazal: Arzo sama kahan teri wos’at ko pa sake By Khawaja Meer Dard

Arzo sama kahan teri wos’at ko pa sake Mera hi dil hai wo ke jahan ...

Leave a Reply

Your email address will not be published. Required fields are marked *