Urdu Poetry: Dil ishq mein be-paayaa’n , sauda ho to aisa ho By Ibn-e-Insha

Dil ishq mein be-paayaa’n , sauda ho to aisa ho
dariya ho to aisa ho, sehra ho to aisa ho

ek khaal-e-suvaida mein, pihnaai-e-do-aalam
fayla ho to aisa ho, simta ho to aisa ho

ae qais-e-junu’n pesha, insha ko kahee’n dekha
vehshi ho to aisa ho, rusva ho to aisa ho

dariya ba-hubaab andar, toofaa’n ba-sahaab andar
mehshar ba-hijaab andar, hona ho to aisa ho

hamse nahi rishta bhi, hamse nahi milta bhi
hai paas wo baitha bhi, dhokha ho to aisa ho

wo bhi raha begaana, hamne bhi na pehchaana
haan ae dil-e-deewana, apna ho to aisa ho

iss dard mein kya-kya hai, rusvaai bhi lazzat bhi
kaanta ho to aisa ho, chubhta ho to aisa ho

hamne yahi maanga tha , usne yahi bakhsha tha
banda ho to aisa ho, daata ho to aisa ho .

Poet: IBN-E-INSHA

Check Also

Urdu Ghazal: Arzo sama kahan teri wos’at ko pa sake By Khawaja Meer Dard

Arzo sama kahan teri wos’at ko pa sake Mera hi dil hai wo ke jahan ...

Leave a Reply

Your email address will not be published. Required fields are marked *