Urdu Poetry: Dil meiN ehsaas-e- gham-e-yaar tha kuchh aur na tha

Dil meiN ehsaas-e- gham-e-yaar tha kuchh aur na tha
Apne jazbaat ka izhaar tha kuchh aur na tha

Karb ki raat thi beKhaab, magar saath mere
Ek hujoom-e-Gam-o-afkaar tha kuchh aur na tha

Asr-e-haazir ke taqaazoN ka koi zikr na tha
Qissa-e-paayal-o-jhankaar tha kuchh aur na tha

Paarsaayee ki sanad sab ki jabeeN par thi, magar
Ek bas maiN hi gunahgaar tha kuchh aur na tha

Jis tamaashe ko bade shauq se dekha sab ne
Ek sharamsaar sar-e-daar tha, kuchh aur na tha

Jis ki dahshat se thi larzeeda teri shaam-o-sahar
Muzmahil saaya-e-deewaar tha kuchh aur na tha

Jis ne alfaaz ke toofaN se bapa hashr kiya
Vo faqat sahab-e-guftaar tha kuchh aur na tha

Hosh ne thaam ke daaman mujhe roke rakkha
Josh aamaada-e-paikaar tha kuchh aur na tha

Uski haq baat badi talkh thi achhchhi na lagi
Warna Maikash bada khuddaar tha kuchh aur na tha

Check Also

Urdu Ghazal: Arzo sama kahan teri wos’at ko pa sake By Khawaja Meer Dard

Arzo sama kahan teri wos’at ko pa sake Mera hi dil hai wo ke jahan ...

Leave a Reply

Your email address will not be published. Required fields are marked *