Urdu Poetry: Girifta dil hain bahot aaj tere deewane By Nasir Kazmi

Girifta dil hain bahot aaj tere deewane
KHUDA kare koi tere siva na pehchaane

miti-miti si ummeedein thake-thake se khayaal
bujhe-bujhe se nigaaho’n mein gham ke afsaane

hazaar shuqr ke hum ne zubaa’n se kuch na kaha
ye aur baat ke poochha na ahl-e-duniya ne

ba-qadr-e-tashna-labi pursish-e-wafa na huee
chhalak ke reh gaye teri nazar ke paimaane

khayaal aa gaya maayoos rahguzaaro’n ka
palat ke aa gaye manzil se tere deewane

kahaa’n hai tu ke tere intezaar mein ae dost
tamaam raat sulagte rahe dil ke veeraane

ummeed-e-pursish-e-gham kis se keejiye ‘Nasir’
jo mere dil pe guzarti hai koi kya jaane.

Poet: Nasir Kazmi

Check Also

Urdu Ghazal: Arzo sama kahan teri wos’at ko pa sake By Khawaja Meer Dard

Arzo sama kahan teri wos’at ko pa sake Mera hi dil hai wo ke jahan ...

Leave a Reply

Your email address will not be published. Required fields are marked *