E-Entertainment

Izn-e-khiraam lete hue aasmaa’n se hum
hatkar chale hain rehguzar-e-kaarvaa’n se hum

kyo’nkar hua hai faash zamaane pe kya kahein
wo raaz-e-dil jo keh na sake raazdaa’n se hum

humdam yahi hai rehguzar-e-yaar-e-khushkhiraam
guzre hain laakh baar isee kehkashaa’n se hum

kya-kya hua hai hum se junoo’n mein na poochhiye
uljhe kabhi zamee’n se kabhi aasmaa’n se hum

thukra diye hain aql-o-khirad ke sanamkade
ghabra chuke hain kashmakash-e-imtehaa’n se hum

bakhshi hain hum ko ishq ne wo jurratein ‘Majaz’
darte nahi’n siyaasat-e-ahl-e-jahaa’n se hum.

Poet: Majaz