Urdu Poetry: Koi umeed bar nahin aati By Mirza Assadullah Khan Ghalib

Koi umeed bar nahin aati,
Koi soorat nazar nahin aati.

Mout ka aik din mu’ayan hai,
Neend kyun raat bhar nahin aati?

Aage aati thee haal-e Dil pe hansi,
Ab kisi baat per nahin aati.

Janta hon sawab-e taa’at-o zahad,
Per tabeeyat idhar nahin aati.

Hai kuch aisi hi baat jo chup hon,
Warna kya baat kar nahin aati!

Kyu na cheekhon k yaad karte hain,
Meri aawaaz gar nahin aati.

Daag-e Dil gar nazar nahin aata,
Boo bhi ae chaaraagar nahin aati?

Hum wahan hain jahan se hum ko bhi,
Kuch humari khabar nahin aati.

Marte hain aarazoo main marne ki,
Mout aati hai, per nahin aati..!

Kaaba kis moonh se jaaoge ‘Ghalib’?
Sharam tum ko magar nahi aati..

Poet: Mirza Assadullah Khan Ghalib

Check Also

Urdu Ghazal: Arzo sama kahan teri wos’at ko pa sake By Khawaja Meer Dard

Arzo sama kahan teri wos’at ko pa sake Mera hi dil hai wo ke jahan ...

Leave a Reply

Your email address will not be published. Required fields are marked *