Urdu Poetry: Main jahaa’n tum ko bulaata hoon wahaa’n tak aao
Main jahaa’n tum ko bulaata hoon wahaa’n tak aao
meri nazaro’n se guzar kar dil-o-jaan tak aao
phir ye dekho ki zamaane ki hawa hai kaisi
saath mere, mere firdaus-e-jawaa’n tak aao
teg ki tarah chalo chhod ke aagosh-e-niyaam
teer ki tarah se aagosh-e-kamaa’n tak aao
phool ke gird phiro baag mein maanind-e-naseem
misl-e-parvaana kisi shaam-e-tapaa’n tak aao
lo wo sadiyo’n ke jahannum ki hadein khatm huee
ab hai firdaus hi firdaus jahaa’n tak aao
chhod kar veham-o-gumaa’n husn-e-yaqee’n tak pahuncho
par yaqeen se bhi kabhi veham-o-gumaa’n tak aao.
Poet: AHMED NADEEM QASIMI
