Urdu Poetry: Mushkil hai ab shehar mein nikle koi ghar se
Mushkil hai ab shehar mein nikle koi ghar se
dastaar pe baat aa gaee hai hoti huee sar se
barsa bhi to kis dasht ke be-faiz badan par
ek umr mere khet thhey jis abr ko tarse
iss baar jo indhan ke liye kat ke gira hai
chidiyo’n ko bada pyaar thaa us boodhe shajar se
mehnat meri aandhi se to manasoob nahi’n thi
rehna tha koi rabt shajar ka bhi samar se
khud apne se milne ka to yaara na tha mujh mein
main bheed mein gum ho gaee tanhayee ke darr se
benaam musaafat hi muqaddar hai to kya gham
manzil kaa ta’ayyun kabhi hota hai safar se
patthraaya hai dil yoon ki koi ism padha jaaye
ye shehar nikalta nahi’n jaadu ke asar se
nikle hain to raste mein kahee’n shaam bhi hogi
sooraj bhi magar aayega is raah-guzar se.
Poet: PARVEEN SHAKIR
Sent By: Imran From Orkut
