Urdu Poetry: Safar ki had hai vahaaN tak ke kuchh nishaan rahe
Safar ki had hai vahaaN tak ke kuchh nishaan rahe
chale chalo ke jahaaN tak ye aasman rahe
ye kyaa uThaaye qadam aur aa gayi manzil
mazaa to jab hai ke pairon mein kuchh thakan rahe
wo shaKhs mujh ko koii jaal-saaz lagataa hai
tum us ko dost samajhate ho phir bhi dhyaan rahe
mujhe zameen ki geharaayio.n ne daab liyaa
main chaahataa thaa mere sar pe aasmaan rahe
ab apane biich maraasim nahin adaavat hai
magar ye baat hamaare hi darmiyaan rahe
magar sitaaron ki faslen ugaa sakaa na koi
merii zameen pe kitane hi aasmaan rahe
vo ek savaal hai phir us kaa samnaa hoga
dua karo ke salaamat meri zabaan rahe
